إلهام شاهين: كنت زوجة تانية والعصمة كانت في إيدي.. ومش لازم نصلي أول ما الأذان يأذن - بوابة مولانا

الأحد 02/مارس/2025 - 12:19 م

كشفت الفنانة إلهام شاهين، تفاصيل زواجها من رجل لبناني كزوجة ثانية، موضحة أنها انفصلت عنه بسبب إخلاله باتفاقهم على مدة معينة لإعلان زواجهما للإعلام، بجانب تعليقها على الجدل الذي أُثير بسبب تصريحاتها عن الصلاة.

وقالت إلهام شاهين، في تصريحات تلفزيونية: اتجوزت راجل متجوز بدون علم مراته لأن كان فيه قصة حب، وإحنا معملناش حاجة ضد الشرع ولا القانون، والتصرف مكنش غلط، ولكن مراته كانت عارفة لأننا كنا مع بعض في كل مكان، ولما تجاوز المدة اللي متفقين عليها ومأعلنش اتطلقت منه، ويمكن يكون ده أكتر راجل حبني في حياتي بالشكل الجنوني ده، كان صادق جدًا في حبه بس الحب ده خلاه غيور إلى حد الجنون وكان عامل قيود في كل حركة وكلمة وصورة ومكناش مرتاحين ولا أنا ولا هو.

وتابعت إلهام شاهين: اتجوزنا لمدة سنتين ونص، والعصمة كانت في إيدي وقالي ما أنتي الراجل روحي اعملي الطلاق، وكان بيقولها بسخرية واتجنن لما عملت الطلاق، وأنا مُقدرة جدًا أنه وافق أن العصمة تبقى في إيدي، لأنه لو مكنش بيحبني بالشكل ده كان قالي لأ لأن ده شرط يخسف وشرط تعجيز، وأنا طلبت الشرط ده لما قالي نأجل إعلان زواجنا في الصحافة والإعلام، ولكن كل اللي حوالينا يعرفوا، وطلبت أن العصمة تكون في إيدي علشان هو لو موفاش بوعده في ميعاد إعلان الزواج أعرف أنا أتمم ورق الطلاق، وأنا مُقدرة ده ليه جدًا لأنه طلب سخيف من أي ست وبيضايق الراجل، ولكن اللي توقعته حصل.

وواصلت: عائلته كانوا عايزين يخلصوا مني من كتر ما هو مجنون بيا، ودفعوا فلوس لـ حد علشان يرمي عليا ماية نار، والحقيقة هو كان راجل كويس أوي.

إلهام شاهين تعلق على جدل تصريحاتها عن الصلاة

وعلقت إلهام شاهين، على الجدل الذي أُثير بسبب تصريحاتها عن الصلاة، قائلة: إحنا في مصر مش بنصلي أول ما الأذان يأذن، لأن في وقت كافي بين الصلوات ممكن نصلي فيه لما يخلص الشغل، ولكن مش يضيع وقت الصلاة إنما مش بالضرورة أول ما الأذان يأذن يصلي خاصة أن ربنا إدانا رخصة نصلي في أي وقت، ورأيي غير مُلزم لـ حد.