الخميس 27/فبراير/2025 - 09:41 م

تحدث البرتغالي جوزيه بيسيرو المدير الفني لفريق الزمالك، على تعادل فريقه أمام زد إف سي بهدف لكل فريق ضمن منافسات الدوري الممتاز.

تصريحات بيسيرو 

وقال بيسيرو في تصريحات للمؤتمر الصحفي عقب اللقاء: زعلان لأننا قدمنا مباراة جيدة، وهناك تحسن في طريقة اللعب وخلقنا فرص كتير، والخصم جاتله فرصة واحدة اللي سجل منها الهدف، لكن مبسوط إن اللاعيبة عرفت تطبق طريقة اللعب بشكل جيد، كان لنا ركلة جزاء ولاعب زد استلم الكرة بإيديه. 

وأضاف: ضد بتروجيت والأهلي وزد كل مباراة كان لينا ضربة جزاء، ليه الحكم ميقدرش يشوف القرارات اللي لينا، وسألت الحكم السؤال ده في الملعب، لكن لعبنا مباراة جيدة، وزعلان علشان نستحق احترام أكثر واللاعيبة كلهم جيدين وبنحاول نحسن مستوانا في كل مباراة، لكن غلطة كبيرة كل مباراة بسبب الحكم، مش عايزين مساعدة من حد، لكن اللي عايزينه شوف الكرة اللي لينا زي ما بتشوف الكرة اللي علينا. 

وواصل: زعلان بسبب عدم الحضور الجماهيري، وبالرغم من كده شايف إن دي كانت أفضل مباراة لينا من حيث الأداء، وخلقنا فرص كتير، وبالتأكيد محتاجين نكسب مباراة علشان نستحق نكسب، وعملنا كل حاجة عشان نكسب في ال3 مباريات السابقة، واللاعيبة زعلانة.

بيسيرو: لو فيه عدل كنا هنحصد نقاط أكثر

وأردف: لو كان فيه عدل في القرارات اللي لينا كان هيبقى معانا نقاط أكثر، وأكيد فقد نقطتين له تأثير على المنافسة في البطولة

واختتم بيسيرو تصريحاته قائلا: لو فيه أخطاء مننا أكيد هنشتغل عليها وبطلب من الجميع يحسنوا من مستواهم وعدم احتساب ركلات الجزاء بيحصل معانا بس، ضربات الجزاء اللي بتكلم عليها مؤكدة وليست محل نقاش، أتمنى إن الحكام يعملوا اللي عليهم ويشتغلوا بشكل جيد علشان الأخطاء ماتتكررش.